Questions Answered
1. Dili ba nag-ingon ang Bibliya nga ang kasugoan saypan (o kon sayop)? (Hebreohanon 8:8)
Tubag: Dili. Ang Bibliya nag-ingon nga ang mga katawhan maoy saypan. “Kay iya [ang Dios] man silang nakaplagan nga may kakulang.” Hebreohanon 8:8. Ug sa Roma 8:3, miingon ang Bibliya nga ang kasugoan “nahuyang pinaagi sa unod”. Kini kanunay susama nga mga sugilon. Ang kasugoan hingpit, apan ang mga tawo ang may sayop, o kon mahuyang. Busa buot sa Dios nga ang Iyang Anak magpuyo sulod sa Iyang katawhan “Aron ang matarung nga gimbut-an sa kasugoan matuman sa sulod nato” (Roma 8:4) pinaagi sa nagapuyo nga Cristo.
2. Nagaingon ang Galacia 3:13 nga kita giluwas gikan sa tunglo sa kasugoan. Imo ba kining masaysay? (Galacia 3:13)
Tubag: Ang tunglo sa kasugoan mao ang kamatayon (Roma 6:23). Si Cristo nakatilaw sa “kamatayon sa matag usa ka tawo.” Hebreohanon 2:9. Busa Iyang giluwas ang tanan gikan sa tunglo sa kasugoan (kamatayon) ug sa iyang dapit naghatag ug kinabuhing walay katapusan.
3. Dili ba ang Colosas 2:14-17 ug ang Efeso 2:15 nagtudlo nga ang sugo sa Dios naapos na sa krus? (Efeso 2:15)
Tubag: Dili, kini nga mga pahina pareho nga nagatudlo sa kasugoan nga nagasulod ug “mga ordinansa” o kon mga kasugoan ni Moises, nga mao ang kasugoang ceremonyal nga nagadumala sa sistema sa mga paghalad ug sa pagkasacerdote. Tanang niining mga ceremonyas ug ritwal nagalandong sa krus ug natapos sa magkamatay ni Jesus ingon sa gitinguha sa Dios. Ang kasugoan ni Moises gipuno hangtud nga ang “kaliwat moabot”, ug kana nga “kaliwat…mao si Crito.” Galacia 3:19, 16. Ang kasugoan sa Dios dili mahiapil dinhi, kay si Pablo nagahisgut niini nga balaan, matarung, ug maayo daghang mga katuigan na human ang krus.(Roma 7:7, 12).
4. Miingon ang Bibliya, “Ang gugma mao man ang katumanan sa kasugoan.” Roma 13”10. Ang Bibliya usab sa Mateo 22:37- 40, nagsugo kanato sa paghigugma sa Dios ug sa paghigugma sa atong mga silingan, ug nagtapos uban ang mga pulong, “Niining duha ka mga sugo nagasukad and tibuok nga kasugoan ug mga profeta.” Kini ba nga mga sugo nagailis sa Napulo Kasugo” (Mateo 22:40)
Tubag: Dili. Ang Napulo Kasugo nasukad gikan niining duha ka mga sugo sama sa atong 10 ka tudlo nga nagasukad gikan sa atong duha ka kamot. Sila dili mabulag. Ang gugma sa Dios nagahimo sa pagbantay sa unang upat ka mga kasugoan (nga may labot sa Dios) nga kahimut-an, ug ang gugma ngadto sa atong silingan nagahimo sa pagbantay sa naulahing unom (nga may labot sa atong silingan) nga usa ka kalipayan. Si Jesus miingon, “Kon nahigugma kamo kanako, inyong pagatumanon ang akong mga sugo.” Juan 14:15. Imposible sa paghigugma sa Dios ug dili magbantay sa Iyang kasugoan, tungod kay nag-ingon ang Bibliya, “Kay ang paghigugma alang sa Dios mao kini, nga pagabantayan ta ang Iyang mga sugo. Ug ang Iyang mga sugo dili mabug-at.” 1 Juan 5:3. “Siya nga magaingon, “Ako nakaila kaniya” apan wala magbantay sa Iyang mga sugo, kini siya bakakon, ug wala kaniya ang kamatuoran.” 1 Juan 2:4.
5. Dili ba ang 2 Corinto 3:7 nagtudlo nga ang kasugoan nga gisulat ug gikulit sa bato “igakasikway na”? (2 Corinto 3:7)
Tubag: Dili. Ang maong pasahi nagaingon nga ang himaya ni Moises sa pag-alagad sa kasugoan mao ang igakasikway na, apan dili ang kasugoan. Basaha pag-ayo sa usab ang tibuok pasahi sa 2 Corinto 3:3- 9. Ang suheto dili ang pagsalikway sa kasugoan o sa iyang baruganan, apan hinoon, ang kausaban sa lokasyon sa kasugoan gikan sa “mga papan sa bato” ngadto sa “mga papan sa ilang kasingkasing”. Ubos sa pag-alagad ni Moises, ang kasugoan anaa sa bato. Ubos sa pag-alagad sa Espiritu Santo pinaagi kang Cristo, ang kasugoan gisulat sulod sa kasingkasing (Hebreohanon 8:10). Usa ka patakaran giposte sa usa ka bulletin sa eskwelahan mahimong epektibo sa diha lamang nga kini mosulod sa kasinkasing sa estudyante. Ang pag-alagad ni Cristo sa kasugoan epektibo tungod kay iyang gibalhin ang kasugoan ngadto sa kasingkasing sa Kristohanon. Ug dayon ang pagbantay sa kasuguan mahimong kahimut-an ug usa ka malipayong pamaagi sa pagkinabuhi tungod kay ang Kristohanon adunay matuod nga gugma pareho nga alang sa Dios ug sa tawo.
6. Miingon ang Roma 10:4 nga “Si Cristo mao ang pagkatapos sa kasuguan.” Busa kini natapos na, dili ba? (Roma 10:4)
Tubag: “Natapos na” niining bersiculoha nagkahulugang katuyoan o kon kalab-uton, sama sa gibuhat sa Santiago 5:11. Ang kahulugan klaro. Ang pagdanig mga tawo kang Cristo—kon diin sila makakaplag ug pagkamatarung—mao ang kalab-uton, katuyuan, o kon ang katapusan sa kasuguan.
7. Ngano nga daghang mga tawo ang nagalimod sa nagahigot nga kapangakohan sa kasugoan sa Dios? (Roma 8:7)
Tubag: “Kay kaaway sa Dios ang panghunahuna nga alang sa unod; kini nagadumili sa pagpailalum sa kasugoan sa Dios, sa pagkatinuod, dili kini makahimo sa pagpailalum niini; ug ang anaa sa unod dili makapahimuot sa Dios. Apan kamo wala diha sa unod, hinonoa anaa kamo sa Espiritu sa Dios nagapuyo sa sulod ninyo.” Roma 8:7-9.
8. Ang mga matarung ba nga mga katawhan sa Daang Tugon naluwas pinaagi sa kasugoan? (2 Timoteo 1:9)
Tubag: Walay bisan usa nga naluwas pinaagi sa kasugoan. Tanan nga namaluwas sa tibuok kaanyohan namaluwas pinaagi sa grasya. Kini nga “grasya nga Iyang gihatag kanato diha kang Crsito Jesus sa wala pa ang kapanahonan nga walay kinutoban.” 2 Timoteo 1:9. Ang kasugoan motudlo lamang sa sala. Si Cristo lamang ang bugtong makaluwas. Si Noe “nakakaplag sa grasya” (Genesis 6:8); Si Moises nakakaplag sa grasya (Exodo 33:17); ang mga Israelhanon sa kamingawan nakakaplag ug grasya (Jeremias 31:2); ug si Abel, Enok, Abraham, Isaac, Jacob, Jose, ug daghan pang mga takus sa Daang Tugon naluwas “pinaagi sa pagtuo” sumala sa Hebreohanon 11. Sila nangaluwas pinaagi sa paglantaw sa unahan ngadto sa krus; kita, pinaagi sa paglantaw balik niini. Ang kamatuoran gikinahanglan tungod kay sama sa usa ka salamin, kini nagpadayag sa “hugaw” sa atong kinabuhi. Kon wala kini, ang mga makasasala apan sila wala nahisayud niini. Apan, ang kasugoan walay gahum sa pagluwas. Kini lamang makatudlo sa sala. Si Jesus, ug Siya lamang ang makaluwas sa usa ka tawo gikan sa sala. Kini kanunay nga tinuod, bisan pa sa oanahon sa Daang Tugon. (Buhat 4:10, 12; 2 Timoteo 1:9).
9. Nganong mabalaka man mahitungod sa kasugoan? Dili ba ang konsenysa luwas nga giya? (Proverbio 14:12)
Tubag: Dili! Sa ikalibo nga beses, dili! Ang Bibliya naghisgut sa usa ka dautan nga konsensya, nahugawan nga konsensya, ug usa ka pinagahing konsensya—wala niini ang luwas. “Adunay usa ka dalan nga daw matarung alang sa usa ka tawo; apan ang katapusan niana mao ang mga dalan sa kamatayon.” Proverbio 14:12. Miingon ang Dios, “Kadtong nagasalig sa iyang kaugalingong kasingkasing maoy usa ka buang.” Proverbio 28:26.